Аввал маълум қилинганидек, “InterHotel” МЧЖ устав капиталидаги давлат улушини (кейинги ўринларда – "Актив") хусусийлаштириш жараёнининг Мажбуриятга эга бўлмаган таклифларни (NBO) қабул қилиш босқичи бошланган.
Ушбу Активни хусусийлаштириш жараёнини илғор халқаро тажриба асосида амалга ошириш учун “Deloitte” халқаро компанияси (кейинги ўринларда – Консультант) хусусийлаштириш бўйича Консультант ҳамда “Ernst & Young” халқаро компанияси мустақил баҳоловчи сифатида жалб этилган.
Мазкур босқичда Консультант тавсиясига кўра 6 нафар инвесторлар иштирок этган ҳамда улар билан Ахборотни ошкор этмаслик тўғрисидаги битим (NDA) имзоланиб, мажбуриятга эга бўлмаган тижорат таклифларини тайёрлаш учун етарли бўлган маълумотлар, жумладан "Deloitte" компанияси томонидан тайёрланган Актив фаолияти тўғрисидаги таҳлилий маълумотлар сақланадиган виртуал маълумотлар хонасига (VDR) кириш имконияти яратилган.
Натижада, ушбу босқичда белгиланган муддат 2024 йил 26 сентябрга қадар, Консультантга 4 нафар талабгорлардан Мажбуриятга эга бўлмаган таклифлари (NBO) келиб тушган.
Консультант томонидан мазкур таклифлар ўрганилиб, барча талабгорларнинг таклифлари Мажбуриятга эга бўлмаган таклифлар (NBO) қабул қилиш босқичининг талабларига мувофиқ деб топилиб, хусусийлаштириш жараёнининг навбатдаги Мажбуриятга эга бўлган таклифларини (BO) қабул қилиш босқичига ўтказиш таклиф этилди.
Шунга кўра, Консультант томонидан Мажбуриятга эга бўлмаган таклифлари (NBO) босқичида таклиф берган барча талабгорларга индивидуал равишда хабарнома юборилади ва жараён хати “Process letter” орқали навбатдаги босқич тўғрисида батафсил маълумот берилади.
Навбатдаги босқич тўғрисида маълумот:
Талабгорларга Мажбуриятга эга бўлган таклифларини (BO) тайёрлаш учун Консультант томонидан тайёрланган Активнинг молиявий, юридик ва операцион фаолияти тўғрисидаги комплекс ўрганиш ҳисоботлари (due diligence) жойланган виртуал маълумотлар хонаси (VDR)га кириш ва Активга ташриф буюрган ҳолда бошқарув органига савол бериш имконияти имконияти берилади.
Консультант томонидан Активни сотиб олиш нархи бўйича Мажбуриятга эга бўлган таклифлар (BO) 2024 йил 21 октябрь соат 23:59 (Тошкент вақти билан)га қадар қабул қилинади.
Шу билан бирга, мазкур муддатга қадар талабгорлар томонидан “E-auksion” электрон савдо платформасида очиладиган шахсий кабинетлари орқали Мажбуриятга эга бўлган таклифларининг камида 1 фоизини кафолатли тўлов (закалат) сифатида ўтказиш талаб этилади. Бунда, мазкур кафолат тўлови (закалат) жараён якунида иштирокчиларга қайтарилади, хусусийлаштириш жараёни ғолиби бўлган талабгорнинг кафолат тўлови (закалати) – сотиб олиш тўловининг бир қисми сифатида Хусусийлаштириш жамғармасига ўтказилади.
“E-auksion” электрон савдо платформасида очиладиган шахсий кабинет ва ҳисоб-рақам кўрсаткичлари Консультант томонидан иштирокчиларга юбориладиган жараён тўғрисидаги индивидуал хат (process letter) орқали етказилади.
Давактив агентлиги хусусийлаштириш жараёнига қизиқиш билдирган ва аризалар топширган барча иштирокчиларга миннатдорчилик билдиради ҳамда Мажбуриятга эга бўлмаган таклифларни (NBO) қабул қилиш босқичидан муваффақиятли ўтган талабгорлар билан жараённинг навбатдаги босқичида конструктив ҳамкорликка ишонч билдиради.
Дисклеймер:
Давактив агентлиги сотиш жараёнининг кетма-кетлигини ўзгартириш ёки потенциал харидорга (харидорларга) сотишни ёки сабабларини тушунтирмасдан исталган вақтда улар билан музокара олиб боришни рад этиш ҳуқуқини ўзида сақлаб қолади.
Ушбу эълон ёки унинг мазмунининг бирон-бир қисми мазкур эълон чоп этилишидан келиб чиқиб тахмин қилиниши мумкин бўлган Давактив агентлиги ва “Deloitte”нинг Активни сотиш билан боғлиқ бирор-бир шаклдаги мажбурияти сифатида талқин қилинмаслиги керак. Давактив агентлиги ва “Deloitte” ўз хоҳишига кўра ҳар қандай вақтда ва ҳар қандай муносабатда, биргаликдаги ёки шахсий жавобгарликни ўз зиммаларига олмасдан:
(i) аризалар бериш муддатига ўзгартириш киритиш;
(ii) турли хил манфаатдор томонлар учун турли хил тартиб-қоидалар бўйича иш тутиш ва/ёки Давактив агентлиги ва “Deloitte” томонидан кўзда тутилган режа-жадвал ва тартиб доирасида исталган бошқа потенциал харидорни (харидорларни) олдиндан огоҳлантирмасдан чиқариб ташлаган ҳолда бир ёки бир нечта потенциал харидорлар билан музокаралар олиб бориш;
(iii) аниқ бир сабабга кўра сотиш жараёнини тўхтатиш;
(iv) ва/ёки исталган вақтда ва сабабларни тушунтирмасдан Савдога тааллуқли бўлган ҳар қандай потенциал харидор (харидорлар) билан ҳар қандай муҳокама ва музокараларни олиб бориш/тугатиш ҳуқуқларини ўзида сақлаб қолади.
